Rano jutros, oko 1 čas, ronioci su iz rijeke Vume u njemačkom Rotenburgu (Donja Saksonija) izvukli tijelo četverogodišnjeg dječaka. Za ubistvo je osumnjičena njegova 40-godišnja majka.
Kako pišu njemački mediji, spasioci su plakali dok su izvlačili malo beživotno tijelo. Majka je prethodno bila u bolnici sa sinom.
– Dijete se tamo liječilo – rekao je državni tužilac Martin Šanc.
Sinoć oko 21 čas majka i sin su nestali iz bolnice. Kada su je pronašli, ona je odvedena na ispitivanja, gdhe je otkriveno da je mališana gurnula u vodu.
Oko 22.30 časova spasioci su počeli čamcima da pretražuju rijeku. Mrtvo tijelo dječaka su pronašli tek poslije dva sata.
– Majka je osumnjičena za ubistvo – rekao je tužilac za njemačke medije. (Naj portal)
